السكن مع عائلة محلية والآداب العامة بالمجتمع الغربي
قراءة المحتوى القادم يمنحك فرصة التأقلم بشكل أسرع بمجتمع مختلف
هذا المحتوى معني بتوفير معلومات مهمة جداً عن الآداب العامة والعادات بالمجتمع الغربي وكيفية التعامل بين عامة الناس. اتباع الطريقة الصحيحة وقراءة المعلومات بعناية يساعدك على التأقلم بشكل سريع مع المجتمع الغربي و إثراء تجربتك بالخارج وإعطاء صورة حسنة عن أخلاق مجتمعنا وديننا.
الكلمات السحرية
'Magic Words'
مصطلح الكلمات/القوى السحرية متعارف عليه بشكل واسع جداً بالمجتمع الغربي وهو بكل بساطة الكلمة اللي تلحق طلب ما، مثل طلبك لوجبة في مطعم او سؤال زميلك بالفصل اذا يسمح يسلفك قلم! طبعاً مجتمعنا يملك طريقة مختلفة لإظهار الاحترام المتبادل، لكن، بالمجتمع الآخر الكلمات السحرية أقرب ما تكون عادة يومية وجزء أساسي من قواعد تحدثهم مع الآخرين حتى لو لم يتم نطقها بطريقة لطيفة. المجتمع الغربي يفصل ما بين اللطافة والاحترام، اللطافة والاحترام مع المقربين إليك والاحترام للكل! (طبعا ما اخفيك ان كثير من الناس لطيفين فطرة خاصة في نيوزيلندا وبعض مدن استراليا مثل مدينة برزبن 💖💘)
عموماً، ما اطول عليك بالمقدمة وندخل بالموضوع.
١- كلمة 'Please' وهي أهم كلمة بتستخدمها باللغة الانجليزية لأن تلحق أي طلب سواء داخل او خارج بيتك والاهمية تكون بجعل الطلب ما ينسمع كأنه أمر (الكلمات السحرية لازم تكون مستخدمة ب ٩٩٪ من محادثاتك). طيب خلني اعطيك مثال تقدر تستخدمه بالكلاس..، '?Teacher, can I ask a question please' طبعاً المعلمين وطاقم المعهد يعرفون تقاليد كل الجنسيات اللي بالمعهد لكن الناس اللي برا أو العائلة اللي بتسكن معهم ما يكون عندهم فكرة كاملة وانت عموماً لازم تحاول قدر الامكان تتعود عليها عشان تتحاشى أي موقف محرج.
٢- كلمة 'Sorry' طبعاً اكيد انت تعرفها لكن بقولك على طريقة ثانية تقدر تستخدم فيها الكلمة. نفرض انك شفت المدرس منشغل في حاجة وانت تحتاج تكلمة بموضوع وودك تجذب انتباهه بأدب، كيف؟ مثال..، 'Sorry teacher, can I talk to you about something' والطريقة الثانية اكيد تعرفها وهي الاعتذار، مثلا اذا نسيت لمبة غرفتك مشغلة وطلعت. بالحالة هذي تقول 'I am sorry, I will turn off the light next time' اعتذار عادي. فيه كلمة أخرى معروفة وهي 'Excuse me' تقدر تستخدمها بمواقف مشابهة.
٣- كلمة 'Thank you' ثاني أهم كلمة وهذي بتعطي انطباع جميل جدا عنك اذا استخدمتها. باختصار شديد تستخدمها بعد حصولك على شي انت طلبته او تم تقديمة لك. انت شخصياً بتلاحظ على الناس تفاعلهم معك بعد ما تقول 'Please' و 'Thank you'
اذا انت وصلت الى هنا ف ان شاءالله امورك بالسليم والمحتوى هذا راح ينفعك بشكل كبير لانك بتقدم صورة حسنة عن بلدك و تخلي الناس تحترمك وتقدرك بالشكل اللي يرضيك ولا تحسب ان الموضوع مبالغ فيه حبتين لأن فعلاً الاشياء اللي قريتها وبتقراها طبيعية جداً وتلقى الاطفال يستخدمونها حتى معك.
طيب الحين بندخل بموضوع سكنك مع العائلة واشياء مهمة لازم تتبعها عشان تكون امورك بالسليم،، طبعا هذي الامور ان شاءالله بتصير شي عادي بالنسبة لك لما تتعود عليها (انا كل الاشياء اللي اكتبها هي خلاصة أكثر من ٥ سنوات مخالطة للأجانب وابيك تتجنب الاحراجات😁)
السكن مع عائلة
١- الوضوء والاستحمام: عند وضوئك لازم تعرف ان
رفع رجلك لغسلها هو غير مقبول عند اغلب العوائل والحل هو كالآتي: غسل ارجلك مكان الاستحمام. الشيء الآخر وهو الاستحمام، حاول قدر الامكان انك ما تنثر موية بكل ارجاء الحمام تكرم لان غالباً بتشارك شخص اخر دورة المياه ونفس الموضوع بالنسبة للوضوء، حاول انك تهدي الوضع شوي وما تنثر كثير، واذا حصل تقدر تنشفه.
٢- وقت العشاء: بعض المرات تكون عندك خطط مع زملائك وما تقدر ترجع وقت العشاء او ما تبي عشاء اساساً. هنا عندك خيارين: أ- ترسل رسالة تطلب منهم حفظ الطعام عشان تاكلة بعدين. ب- تقول انك ما تبي عشاء. (يفضل تراسلهم الظهر او قبل اذا ما تبي عشاء عشان ما يطبخون لك) الشيء الآخر: نفرضك انك خلصت عشاء معهم، شل صحنك الله لا يهينك واغسله 👍.
٣- غرفتك: بكل بساطة رتب سريرك وعلق ملابسك والقراطيس حطها بمكانها.
٤- المخلفات: انت بتلاحظ على طول ان فيه مكانين للمخلفات تكرم، مخلفات عادية (قشر بيض وخلافه) ومخلفات لإعادة التكرير (قوارير بلاستيك او حديد)، بالنسبة لهم الامر مهم جداً جداً ارجو انك تنتبه له.
٥- المرجلة الزايدة: انا صراحة ترددت قبل اكتب هذي النقطة بعد ما ذكرها لي زميلي لكن ألخصها لك بعدة كلمات، اللي عليك سوه واللي ما عليك لا تسويه😄.
٦- اوقات النوم: ممكن اكثر شي بتستغرب منه هو ان وقت النوم عندهم جداً مبكر، انت غير مجبور انك تنام بدري اكيد لكن لازم الساعة ١٠ الليل يكون الصوت منخفض. تقدر تستخدم سماعاتك اذا تبي تناظر شي بجوالك او اللابتوب واذا تبي تكلم بالجوال حاول تتحفظ على مستوى صوتك. غير كذا، نفرض انك بترجع متأخر بالويكند، اتمنى انك ترسل لهم رسالة انك بتتأخر واكيد وانت راجع تدخل بكل هدوء عشان الاطفال او نفس العائلة يكون عندهم دوام الصباح.
بالنهاية، انا متأكد انك بتمثل نفسك اولاً بشكل ممتاز وتمثل اولاد/بنات ديرتك ثانياً بحيث انك تترك صورة حسنة وبنفس الوقت تتجنب اي احراجات 👍